سنڌ جي اڪثر ضلعن ۾ سخت گرمي جي لهر هيٽ ويو برقرار رهيو ۔ موسميات کاتي موجب صوبي ۾ 31 مئي تائين وچولي کان شديد هيٽ ويو واري صورتحال جاري رهي سگهي ٿي۔
موسميات کاتي مطابق سکر، لاڙڪاڻو، دادو ۽ نوابشاهه ۾ گرمي پد 47 کان 50 ڊگري سينٽي گريڊ تائين پهچي سگهي ٿو. جڏهن ته موهن جو دڙو، شڪارپور، جيڪب آباد ۽ خيرپور ۾ به گرمي معمول کان 4 کان 6 ڊگري وڌيڪ رهڻ جي اڳڪٿي ڪئي وئي آهي۔
ان کانسواءِ ٿرپارڪر، بدين، حيدرآباد، ميرپورخاص ۽ ڄامشورو ۾ پڻ گرمي پد 44 کان 47 ڊگري سينٽي گريڊ تائين وڌڻ جو امڪان ظاهر ڪيو ويو آهي۔
سخت گرمي جي صورتحال کي نظر ۾ رکندي موسميات کاتي لاڳاپيل ادارن کي الرٽ رهڻ ۽ ڪنهن به اڻ وڻندڙ واقعي کان بچڻ لاءِ ضروري قدم کڻڻ جي هدايت ڪئي آهي۔
ٻئي طرف ڪراچي بابت موسميات کاتي ٻڌايو آهي ته شهر ۾ ايندڙ ٽن ڏينهن دوران موسم گرم ۽ نمي وارو رهندو، جڏهن ته وقفي وقفي سان تيز هوائون به هلنديون رهنديون۔
موسميات کاتي موجب اڄ ۽ سڀاڻي ڪراچي ۾ گرمي پد 37 ڊگري سينٽي گريڊ تائين رهڻ جو امڪان آهي، جڏهن ته ڇنڇر ڏينهن اهو وڌي 38 ڊگري سينٽي گريڊ تائين پهچي سگهي ٿو۔ شهر ۾ ڏکڻ اولهه کان سامونڊي هوائون هلنديون رهنديون۔